समस्यामा परेका व्यवसायीको ऋण पुनर्संरचना गर्न असारसम्म समय थप

समस्यामा परेका व्यवसायीको ऋण पुनर्संरचना गर्न असारसम्म समय थप

काठमाडौं। नेपाल राष्ट्र बैंकले कोरोना भाइरस (कोभिड १९) महामारीका कारण समस्यामा परेका व्यवसायीको ऋण पुनर्तालिकीकरण र पुनर्संरचना गर्न समय थप गरेको छ ।

मौद्रिक नीतिको अर्धबार्षिक समीक्षाका क्रममा आइतबार राष्ट्र बैंकले कोभिडका कारण समस्यामा परेका ऋणीहरुलाई थप राहत दिने जानकारी दिइएको हो । राष्ट्र बैंकका गभर्नर महाप्रसाद अधिकारीले पर्यटन व्यवसायीबाट आएको गुनासोका आधारमा असार समान्तसम्मका लागि पुनर्संरचनाको म्याद थप भएको बताए ।

यसअघि मौद्रिक नीति जारी गर्ने क्रममा पुससम्म ऋणको पुनर्संरचना गर्नुपर्ने र कुल ब्याजको १० प्रतिशत भुक्तानी गर्नुपर्ने व्यवस्था गरिएकोमा अब पर्यटन व्यवसायीलगायत समस्यामा परेका ऋणीहरुले असारसम्म ऋणको पुनर्संरचना गर्न पाउने र कुल ब्याजको पाँच प्रतिशत भुक्तानी गर्नुपर्ने व्यवस्था गरिएको छ ।

कोभिडको प्रभावका कारण ऋण नतिरी र कर्जाको पुनर्तालिकीकरण पनि नगरी बस्ने व्यवसायीलाई नेपाल राष्ट्र बैंकले थप सुविधा दिने व्यवस्था गरेको हो उनले बताए । नयाँ व्यवस्था अनुसार बैंकहरुले कोरोना माहामारीले ऋण तिर्न नसकेकाहरुको धितो लिलाम र कालोसूचीको सूचना प्रकाशन गर्न नपाउने भएका छन् । कतिपय बैंकले ऋण नतिरेको भन्दै ऋणीहरुलाई कालोसुचीमा राख्न थालेपछि विरोध पनि भइरहेको थियो ।

गभर्नर अधिकारीले आर्थिक क्रियाकलाप सामान्य बन्दै गएको र आर्थिक परिसुचकहरुमा पनि सुधार हुँदै गएको बताएका छन् । उनले सेयर धितो कर्जाको सीमा घटाइने विषयमा कुनै तयारी नगरिएको पनि बताएका छन् । सेयर बजार अस्वाभाविकरुपमा उकालो लागिरहेको बेला सेयर धितो कर्जाको सीमा घटाउने सक्ने अडकल भइरहेको बेला अधिकारीले त्यो संभावना नरहेको बताएका हुन् । उनले लघुवित्तको सेयरमा गरिने लगानीमा पनि कडाइ गर्ने कुरा स्वीकार गरेनन् ।

गभर्नर अधिकारीले मौद्रिक नीतिका प्रावधानले वित्तीय तथा आर्थिक क्षेत्रलाई राम्रै गरेको भन्दै बचाउ पनि गरे । उनले मौद्रिक नीतिका व्यवस्था प्रभावकारी भएकाले यसमा परिवर्तन नगरिएको बताए । अनिवार्य तरलता अनुपात, बैधानिक तरलता अनुपातलाई आवश्यक परे बीचमा पनि पुनरावलोकन गर्न सकिने अधिकारीको भनाई छ ।

राष्ट्र बैंकले सहुलियतपूर्ण कर्जा तथा पुनर्कर्जा लिने ऋणीको नाम सार्वजनिक गरिने, साना जलविद्युत परियोजनालाई पुनर्कर्जा उपलब्ध गराइने पनि जानकारी दिएको छ ।

यो समाचार कर्पोरेट नेपाल डटकमबाट साभार गरिएको हो । यसलाई कर्पोरेट नेपालमा पढ्न तलको लिङ्कमा क्लिक गर्नुहोला ।

https://www.corporatenepal.com/news/detail/205867/

Leave a comment

Send a Comment

Your email address will not be published. Required fields are marked *