गएरातिबाट परिरहेको अविरल वर्षाका कारण आएको बाढीले कैलालीको भजनी नगरपालिका तथा कैलारी गाउँपालिकाका अधिकांश बस्ती डुबानमा परेका छन्। त्यस्तै, गौरीगंगा नगरपालिका– ९, मा पनि केही बस्तीहरू डुबानमा परेका छन्।
बाढीका कारण कैलारी र भजनीमा दर्जनौँ परिवार प्रभावित भएका छन्। बाढीले घर डुबानमा परेपछि कैलारीमा ४२४ घरमा पानी पसेको गाउँपालिका अध्यक्ष राजसमझ चौधरीले बताए। चौधरीका अनुसार वडा नम्बर १ डम्मरा, हरिनगर, शिवटोल, डाँडाटोल, विसनपुरलगायत अधिकांश बस्ती डुबानमा परेका छन्। वडा नम्बर १ मा एक सय घरधुरी डुबानमा परेका उनले जानकारी दिए।
त्यस्तै, वडा नम्बर ५ पुरानो मनिकापुर, नयाँ मनिकापुर, बंगालीपुर, पवेरा मण्डी, बनरगौडी गाउँ र सपना शिविर डुबानमा परेका गाउँपालिकाले जनाएको छ। यो वडामा १७४ घर डुबानमा परेका अध्यक्ष चौधरीले बताए। त्यस्तै, वडा नम्बर ७ को भुँइयाफाँटा, बसन्ता, छटकपुर बसन्ता, नारायणपुर र वडा नम्बर ८ को पृथ्वीपुर, भाघा, पूर्वतेडीलगायत बस्तीहरू डुबानमा परेका गाउँपालिकाले जनाएको छ।
